دئدیم:ای غنچه دهن ،کونلومی قان ایله میسن

دئدی:«بیجا یره عشقمده فغان ایله میسن»

دئدیم:انصاف ایله اینجیتمه منی عاشقینم

دئدی:«گیت،سریمی دنیایه عیان ایله میسن »

دئدیم:آغلاتما منی سرو بویون شوقینده

دئدی:«گوزیاشینی بیهوده روان ایله میسن»

دئدیم:آخر گوزلیم ،باغ و بهاریم سن سن

دئدی:«سن عمرینی حسرتله خزان ایله میسن»

دئدیم:آز چکمه میشم گوزلرینین حسرتینی

دئدی:« ئوز کونلونی یر سز نگران ایله میسن»

دئدیم:عشقینده اسیرم ،منه بس خیری نه در؟

دئدی:«اولده بو سوداده زیان ایله میسن»

دئدیم:عشق آتشی نیلر منه ؟قورخان دگلم

دئدی:«بیچاره ،یانارسان،نه گمان ایله میسن ؟»

دئدیم:ای گل ،من ازلدن ده گوزه ل عاشقیم

دئدی:«سن روحینی عشق ایله جوان ایله میسن

دئدیم:هر گون سر کویینده دولانماقدر ایشیم

دئدی:«طاهر،نه گوزه ل یرده مکان ایله میسن»